Biografija
Jěwa-Marja Čornakec narodźi so lěta 1959 we Worklecach a wotrosće we Wotrowje. Po wopyće Wotrowskeje a Pančičanskeje šule maturowaše lěta 1977 na SRWŠ w Budyšinje. Po studiju na Fachowej šuli za wědomostne bibliotekarstwo w Lipsku dźěłaše wona wot 1980 do 1984 jako wědomostna bibliotekarka na Budyskim Serbskim wučerskim wustawje a na to lěto w Instituće za serbski ludospyt. Wot 1985 do 1990 studowaše na KMU w Lipsku kulturne wědomosće/sorabistiku. Po tym dźěłaše znowa jako wědomostna sobudźěłaćerka w Instituće za serbski ludospyt. Wot januara 1992 hač do julija 2011 skutkowaše Jěwa-Marja Čornakec jako šefredaktorka Rozhlada a wot awgusta 2011 do julija 2025 jako wuwićowa dramaturgowka w Serbskim ludowym ansamblu w Budyšinje.
Załožba za serbski lud spožči jej dnja 15. oktobra 2011 Spěchowanske myto k Mytu Ćišinskeho za jeje wukony na polu serbskeje dźěćaceje literatury a za jeje skutkowanje jako awtorka dźiwadłowych hrow.
Statne ministerstwo za wědomosć, kulturu a turizm Swobodneho kraja Sakska wuznamjeni ju dnja 17. junija 2024 z Mytom Zejlerja za jeje wusahowace zasłužby na polu serbskeje literatury.
